نوکیں سال

🌹بیل ءُ یلان بیا اِت
 مرچی شماکجا اِت؟ 
 آتکگ مرو بھارگاہ
 وش آتک کن اِت بھار ءَ

🌹سُھریں ھنارانی پُل 
چو مَڈمانی چَنگُل 
کُمری گوں ساز ءُ زیمل
 نازین ایت وَش بھار ءَ
🌺🌺🌺🌺🌺🌺
زندمان ءِ الھان اِنت. 
بُود کاے اَنت جھان ءِ تُستگیں دَھل ءُ کشار
سبز ءَ بَہ اَنت پٹ ءُ گیابان ءُ کوھستگانی جَرّ ءُ دار
بُرزءَ بیت ھر دمگ ءَ کُلی ءُ کَوگ ءُ سیسوگ ءُ ایدگہ مرگانی توار
پُرّ آپ ءُ لیڑہ،گوک ءُ گامیش
بُز ءُ پاچن ءُ گورانڈ ءُ میش 
ماں کوہ ءُ گر ،دشت ءُ کھچراں 
ٹلّ ءُ مَلّان بَہ اَنت 
بگجت ءِ شیپول 
شوانگ ءِ نل ءِ توار نہ تھنا ھر میتگ، ھلک ءُ دیار
بلکہ پَلَک ءِ ماہ ءُ استار اں سر ءَ بیت 

نوں مالوم ءَ بیت بھارگاہ اِنت ءُ نوکیں سال ءِ بنگیج

بلے امبریگیں سال ءِ بھارگاہ چوشکہ گوستگین سالانی بھار نہ اِنت
مکڑی ءُ سہ پادگ ءِ سرا ھیزکے درَنگ نہ اِنت. 
شیرزالانی گُداں چوشکہ ھَمک سال ءَ سُھر رنگ نہ اَنت
کنجل ءُ سیاھیں سرومگ ءِ بدل ءَ کاڈانی چم بازیں ارسانی ریچگ ءَ سُھر اَنت 
 ھلک ءِ دزگھاران چاپ ءُ نازینک ءِ بدل ءَ موُتک ءُ مودگ  کار اَنت 

چی ءَ کہ آیانی گموار دزگھار
آیانی بانداتگیں آزمان ءِ ماہ ءُ استار
 بانک کریمہ نہ اِنت

مِئیدان چہ ماھیگ ءِ شکار ءَ واتر نہ کتگ اَنت
 چہ مرز ءَ براتانی لاش اِش یاورتگ 

گوں اے بلاھیں مسیبت ءُ سَلّہ ھَاں ،کوم چتور بھارگاہ ءَ ماریت ءُ شادھیں درگتاں وشھال ءَ بیت؟؟؟ 
"گڑاں نوداں گور شما مِنّت اِنت بھل اِت گوارگاں نرمیناں" 

کوراں شما بہ رُمب اِت 

مُرگاں کوکو کن اِت

ھوُرت ءُ بُزگلاں  تْرَڈ کن اِت 
سمین درچکان ءَ پہ کھیب بہ چَم اِین 
کہ مابلوچ کوم ءُ راج اندوھانی آماچ ایں
 
ایش اِنت مئے بھار ءُ بھارگاہ

         🤲🏻یارب 
کوم ءِ پُشت ءُ پارت
  ھروھد ءُ درگت 
تو وت ئے وَت

📝محمدرحیم ساسان
زاھدان
99/12/29