8 اکتوبر کودکانءِ جهانی روچ

 حرمت دارین دوستان 8 اکتوبر کودکانءِ جهانی روچ اِنت اِی روچءَ په جهانءِ تمامین کودکانءُ وتی دیارءِ سرجمین کودکان مرادبات گوشین

په همئ نیمونا کودکانءِ باروا گپءُ تران پیشءَ کنین

دوستان بارئن زان اِت یونیسف چی اِنت ؟ ءُ یونسفءِ کارچی آِنت؟؟؟                                

سازمان ملل متحد مرکز ئےداریت په نامءِ صندوقءِ کودکان ملل متحد.هما وهدا که جهانی جنگءِ دومی پرّامءُ مرحله بنگیج بوت بازئن زهگءُ کودک سَلی ولیءُ سیوالءُ بی کس بوت اَنت .چه نظر وردءُ وراک گون مشکلان دچار بوت اَنت .په اِے حاطرا که زهگان چوشین درگتءُ وهد ئےچه گژنگئُ شُدیگی نجات دیگءُ رکّینگ بئنت لهتے حُدادوست په اِی انسانی کارءِ رواج دیگا همتءُ ای مرکزا پیم کرت آَنت ءُ مه سالءِ 1935 عیسایی اکتبرءِ ماها سازمان مللءِ بنجاها اِی په عنوانءِ یک دائمی ارکانءِ چه سازمان ملل زانگءُ منّگ بوت

آزیزان  مهرماهءِ شانزهمی  روچ برابر گون 11 اکتبرا، کودک ءِ ناما ایر کتگ اَنت

اِ ےروچ جوانین درگتءُ گهترئن نیمونے  که وتی  ڈیهءُ دیارءِ کودکانی زندءِ گومءُ جاورا  گپ کنگ به بیت .پیش چه هرچیزئےگون عاجزئن حالتیءَ الله ءِداربارا دعا کنین که الله جل جلاله مئی ملکءُ دیارءُ جهانءِ سرجمین کودکانءَ که آوانی باطنءُ فطرت پاک اِنت ،چه هر بدُ بلاهےرستگارءُ نجات بِدَنت.

          زهگانی تالیمءُ تربیت

لهتے روایتانی مطابکا هر انسانءِ زند ،5  مرحلهءُ پرّامءَ داریت 

1. ماتءِ لاپ
2. نُنُکی
3. کودکی
4. نوک ورنائی
5. ورنایی

دینءِ بزرگانءُ روانشناسُ تربیتی کارزانتان گوشنت هریکےچه اِی مرحلهءُ پرّام انسانءِ تالیمءُ تربیت شروعءُ بنگیجَ بیت

دگه روایتءِ توکا آتکه انسان پیش چه ایشی که ماتءِ لاپا به ببیت ماتءُ پت هم باید اِنت وتی زهگئ تالیمءُ تربیتءِ باروا هیالداری کن اَنت .هرپیم زهگ چه کودکی تا نوک ورنایی اگن انسانی ءُ اسلامی تالیمءُ تربیتءِ سرا به ببیت چوشین مردم هچ وهد په ماتءُ پتا دِکّ دلءَ نه بیت ،اگن زهگ په جوانی تالیمءُ تربیت مه بیت ماتءُ پتءِ چوشین زهگ زندگیءَ جهندمَ کنت

حضرتءِ امیرالمومنین علی علیه السلام فرمایشءَ کنت : زهگءِ دل مه کسان سالی شُوَم جتگینءُ آمادهین زمین اِنت هرچے آیی دلا کشگ به بیت سبزءَ بیتءُ رُدیت. گڑاماتءُ پت که زهگءِ زندگی تالیمءُ تربیتءِ کشارگر هست اَنت باید اِنت دلگوش کن اَنت زهگانی دلانی هوشاپا چئ کشگ اَنت همدلی ،دوستیءُ محبت دو اساسءُ بُنک اَنت تاکه زهگءِ تالیمءُ تربیت په چوانی رواج به گیپت . اگ اِی دابا مه بیت زهگ چوشین لوگءُ دوارا هروهد کینگیءُ کارهرابءَ بیت ءُ په مهلوکءُ مردمان مزنین جنجالءُ مشکلان ا ڈءَ کنت .کم گندگءَ بیت ماتءُ پتانءِ که وتی زندگیءِ توکا مدام جنگءُ جیـڑه داشته بینت آوانی زهگ چه نظر روحیءُ روانی کینگی ءُ بد نیتءُ بد واهءَ بینت.

کودک یا هما گونڈئن زهگ گون پاکءُ سالمین فطرتءُ وجود چه ماتءَ بیت الله نبی  اکرم صلی الله علیه و آله رسول پرمائشءَ کنت: زهگ چه مسلمانانی زهگ بئینت چه کاپرانی زهگ تمام فطرتءی اسلامءِ سرا هست اَنت بزان درستان پاکءُ سله بی گناهءُ بی خطا هست آَنت اِی ماتءُ پت هست اَنت که زهگانءَ مطابک گون وتی دینءُ آیین تربیتءُ تالیمءَ کن اَنت.مات پت جهود اَنت زهگا جهود یا که آتش پرستءُ مجوس هست اَنت زهگئَ وتی دین یاتءَ دینت مومنءُ مسلمان په اِی خاطرا که آوانی زهگ اسلامءِ جوانین راهءُ رهبندا پابند بئینت بایدنداِنت ماتءُپتان آوانءَ گون اسلامءِ تچکین راه درستی ءُ آشنا کن اَنت .

بزرگانی زندءِ حال

  سید جمال الدین اسد آبادی

سید جمال الدین اسد آبادی  یکےءِ چه اسلامءِ مزنین ءُ نامدارین نپران اِنت که وت واجه لوٹ،دور هیال،پلسپی ،سیاسیءُ اجتماعی اندیشهءُ پگرءِ واهنداَت.

آیءِ دلی واهگءُ آرزو همیش اَت که رودرآتک بزان شرقی ءُ هنچوش مهمتر چه هرچیزءِ مسلمانانی ملکءُ دیارهمدلیءُ تپاکی دوستیءُ براتی رواج ببیتءُ مزن واکءُ سامراجین ملکان که بیوسن ملکانی هول کنوک اَنت آوانی راه چه اِی هندءَ بند کنگ ببیت .

دگه مولءُ واهگےءِ که واجه سید جمال الدین اسد آبادی  آییءِ گندگءَ واهوک اَت اِش اَت که اسلامی ملکءُ کشوران درستان اتحادیه اسلامی داشته بینتءُ درست یک پگرءُ اندیشءِ سرا بینت . سید جمال الدین اسد آبادی په اِی واهگءِ رسگءَ وتی سرجمین عمرا په گشتءُ گول کنگءَ گوازینت ،گون بازین اسلامی حاکمءُ سرمستران دیدارداشتءُ وتی اوستءُ واهگانی بابتءَ گپ کت که چه بازین ملکان مصر،عثمانیءُ ایرانءِ شاهانءَ ملاکات بوتءُ گون آوان گپءُ تران بوت .هنچوش اِی واجه په مزنین سامراجءُ حون وار انگریزءِ رنگ ریزءِ مکرانی پدرکنگءَ مزنین محنتان برداشت کت اَنت. په اِی حاترا که واجه  سید جمال الدین اسد آبادی  وتی مولءُ مکسدانءَ سرجمین مهلوکءُ مردمان سهی بکنت یک روتاکے ءِ "عروه الوثقی" نامءَ پاریسءِ شهرا چاپءُ شنگ کرت .

***

راست گوشتگ اَنت کدیمی مردمان که؛ نیکین مردمانی عمر کم اِنت ،عاکبت اِی نامدارین زانوگرءُ باهند کنوک گون زهرءِ وارینگءَ شهیدءُ چه اِی کورهین دهرا رکست بوت .

ما دعاکنین که الله تعالی اسلامءِ دلسوزءُ گمواران چه هر بدءُ بلاهان  نجات به دَنتءُ چه مکارانی مکرءَ هم آوانءَ رستگاربکنت .

آمیـــــن

روستایءِ روچ ایرانءِ ملکءُ کشورا

 

مهربانین 2مهرماه ءِ 1393نندئءُ دیوانے  وزارتءِ کشورءُ ارشاد اسلامی وزارتءِ زمه دارانی همنادیءُ هم دیوانئءَ  برجم بوتءُ همودان حکم کنگءُمالوم کنگ بوت که په حاطرءِ دهءُ کلگانءُ آوانی نندوکانی ارزشءُ حرمتءِ دارگا 15 مهرماه  روستاءِ نامءِ روچ ءُ مولمءَ نامینگ به بیت .چه آدیوانءَ باد عمومی فرهنگءِ شورایءِ تها 15 مهرماه روستای روچءَ منگءُ کبول کنگ بوتگ . ای روچا تبریکءُ مراد باتءَ گوشیئن           

دهءُ گلّگ،هنچوش گلّگ نندوکان په ملکءِ باپاریءُ اقتصادءِ دیمابرگءَ مزنین نکشُ تاثیرئے داراَنت،پدا په اِ ے  حاطرا که اے  زحمت کشین مردمءُ مهلوک دلگوش دئیگ به بئینت  مناطق محرومءُروستایی دیمرویءِ معاونت کشورءِ توکی وزارتخانه محنت کت تانکه 15 مهرماه ایرانءِ اسلامی راجدپتر بزان تقویمءِ توکا په نامءِ روز روستا مالومءُ ثبت کنگ بوت .

آزیزان مکسد چه ای روچءِ منگُ تصویب کنگ چی بوتگ دلگوش کن اِت.

په ای حاطرا که روستا دودءُ ربیدگءِ بُندری محلءُ هنکین اِنت ءُ گون نوکین تکنیکءُ وسایلان هنگت وتی دودءُ ربیدگءِ سمبالگا محنت کنگ اَنت اِی محلءُ بُندر اهمیت دیگ به بیت تانکه روستای نندوک بزان اَنت که آوان په پتءُ پیروکانی دودءِ زندگ دارگا  باز کارکتگ اَنت .

روستایءِ روچ زندگ دارگ به بیت تانکه دولتیءُ حکومتی ذمه داران وتی پگرءُ هیالا گیشتر په دهءُ کلگ نندوک بکن اَنت ءُ آوانی واسته کاربه کن اَنت  ، زبهریءُ محرومیت دور کنگ به بیت.

دگه ایش که 50 درسد چه ملکءِ اقتصاد چه روستا ، دهءُ کلگ نندوکانی نیمگا اِنت. شهرمردمانی نانءُ وراکءِ بارواباز جهد کنگ اَنت . باید اِنت روستائیانءِ واستا وسءُ امکانات تیارکنگ به ببیت تانکه په راحتیءُ آسودگی گیشتر کار کن اَنت .

یکے دگه ایش اِنت که روستائیان بزان اَنت که چه نظامءِ جمهوری اسلامی زمه واران ءِ نیمگا بی هیالءُ بی تران نبوتگ اَنت بلکه نظام واهندان آوانی هیالا داراَنت.

پدا اسلامی انکلابءِ حکمءُ دستوراِنت که روستایی مردمانی مشکل باید اِنت حل کنگ بینت .دگه ایش که روستاییان شهرانی نیمگا بارءُ شوارءُ مه کن اَنتءُ روستا بزان دهءُ کلگ حالی مه بینت

هنچوش بازئن دگه مکسدءُ مول بوتگ اَنت که روستایءِ روچ منگءُ تصویب کنگ بوتگ که اِی وت روستای ءِ اهمیتءُ ارزشءِ پیشداروک اِنت

 

حسنءُ زیبایی

روچ ئے شاگردئے شه  وتی حکیمین استادءَسوج کت  انسانءِ حسنءُ زیبایی مه چه چیزا اِنت؟

استاد دو کاسگءَ شاگردءِ دیما  ایر کت ءُ گوشت: اِے دوکاسگءَ سئیل کن یکے شه طلاه اِنتءُ آدگه شه کپل  آکه طلاهی اِنت آییءِ تها زهر رهتگ آدگه که کپلءُ حاکی اِنت آییءِ تها ورگی آپ اَنت نون منا بگوش تو کجام یکینءَ زورئے ورئے؟

شاگرد پسود دات :استاد من گلی ءُ کپلی کاسگءَ زوران .

 استاد وتی شاگردا سرکچ دات که انسانءِ همے داب اِنت آچیزئے که انسانءَ ارزشءُ اهتبارءَ دَنت انسانءَ شرپءَ دَنت آییءِ اندرونءُ آییءِ احلاکءُ رپتاراِنت نه دگه چیزئے .انسانءِ ظاهر هچ وهدا مالومءَ نه بیت .

 

کـــــدو یاکُــوَسیچّ

 پلءُ گلابین دوستان کـــــدو یکے چه سبزیان اِنت که گرماگءِ موسمءَ رُدیتءُسبزءَ بیت کدو اِے ویتامینانC.A ءُهمئ پیم منزیم پتاسیم مس فیبر فولات فسفرُ ریبو فلاوینءَ  داریت کارزانتان گوشنت  منگنزکه یکے چه گهترئن وراکی موادن شمارکنگءَ بیت کدوئِ توکاهست کمینءِ ب 1 ءُ ب6 ویتامنا هم داریت کسانئ که هیسک بران آسم ءِ نادرایهَئ داراَنت کدو په آوان زبراِنت  کدوءِ وارتن چه شومکءُ سرطان ءَدیمگیریءَ کنت

 کسان ئے که باز پزوراَنت دلمانگ اَنت وتارا لاگر کن اَنت نه گراستگئن کدوا رنده کن اَنتءُ گون بستگ بور اَنت په لاگریءَ بازکارساز اِنت

 ماتءُ گهاران ئے که ماشینی مرگءَ هتوکءَ کن اَنت په اِی هاترا که آوانی هتوک وشتام تر به ببیت کدو حلوائی به پاچ اَنت چه نیمه دو یا سئی کپ اَنت مرگئِ هتوکانءِ تها بگراداَنت اِی هتوک باز وشتامءُ وش مزّگءَ بئنت

کدوُ شیلانچ هم باز جوانینءُ وشتامین وراکی اِنت بگرا اِتءُ نوشءِ جان کن اِت    

مسلم بن عقیل حضرت امام حسن علیه السلامءِ کاسد په بیعت گرگ چه کوپهءِ مردم

آزیزئن براتانءُ گهاران .دنیا چه هما وهدا که بوتگءُ دان وهدیکه بیت ظالمءُ مظلوم گون یکءُ دگران مکابله داشتگ اَنت. ظالمان چنت روچ چه وتی زندگیءَ ظالمئن کاران کرتگءُ رند چه مدت ئے آوانی دورءُ زمانگ هلاس بوتگ .چه آدم ءِ زمانگا دان مئی زمانگءَ روزگار همے  راهءَ روان اِنت . البت باهند کنوکءُ زُرمبشت کنوکاں که ظالمانی دیما اوشتاتگ اَنت ءُوتی باهندا داشتگ اَنت آوان نه مُرتگ اَنت بلکه همیشهءُ هروهدا نمیرانءُ ابدمان اَنت .

یکءِ چه اِی زندگینا ں مهتر،امام حسین (ع) اِنت؛ تا جهان هست تا دنیایءِ مردم نپس کشگ اَنت امام حسین(ع)ءَپه سربلندی عزتُء پهر یاتءَکن اَنت .یزیدءِ باروا هرکس گوشیت که یزید مرتگءُ باد چه وتی مرکءَ هم بنّامءُ رسوااِنت .

چه کربلایءِ پر رنجءُ بلا گیشتربـــزان اِت؟

بادچه شومئن یزیدءِناروایی ظلمءُ پساتءَ کوفهءِ مهلوک په امام حسینءِ محضراکاگد ءُ نامه نبشت اَنت که تو چه مدینه منوره مئی گورا بیا ،اِ ے دمگءِ مردم ترا لو ٹوک اَنت.

واجه امام حسین (ع) په حکءِ گوانک جنگءُ عدلءِ برکرارکنگءَ سرگپت که دیم په کوفهءَ بروتءُ دانکه اودانءِ مردمانءَ چه یزیدءِ دستءَ نجات به دَنتءُ برکین ایت.

البت کوفیان چه هما اولءَ بدکولءُ بدعهد ،سُست ایمانءُ ناروائن مردم بوتگ اَنت پیمءِ که همءِ مردمان سَوَب بوت اَنت،امام حسین (ع) دردانگئن پت ،امیرالمومنین حضرتءِ علی(ع) گون هماوانی مکرءُ اچاوگ شهید کنگ بیت.

هرپیم امام حسین (ع) ءِ دینی وظیفه ءُ زمه داری باعث بوت  که چه مدینه منوره دیم په بگدادءُ کوپه روانه ببیت.

واجه دلءِ نیتءُ اراده ایشت اَنت که "په  منی پیروکءِ دینءِ نجات دیگءُ حمایت کنگءَ منی سر،جانءُ مال ندراِنت. گڑ ا واجه  گون دلءُ جان وتی تیاریءَ په آدیارءِ روگءُ په سنتءُ رسمءِ "امرپه معروفءُ نهی چه منکرا  داشتگ ببیت .

اولسرا واجه گوشت گهتراِنت من یک کاسدءُ نپر ئے آهندءُدمگءَ روانه کنان .تانکه گون آدیارءِ مردم گپءُ تران بکنت، بیعت بگیپتءُ مردمءُ مهلوکانءَ حال به دَنت که من شمئی گورا کایان .

امام حسین (ع) په اِے کارءَ ،وتی ناکوءِ زهگ واجه مسلم بن عقیل رضی الله عنه ءَ کاسد ءُ نپر کت.

                                                                               

مسلم بن عقیلءِ باروا گیشتر بزان اِت ....

مسلم بن عقیل رضی الله عنهما،  حضرتءِ امام حسین(ع)ءِ ناکوزاتک بزان ،عقیلءِ چک اِنت،عقیل حضرتءِ علی (ع) ءِ براتءُ ابوطالبءِ چک  اِنت .

امام حسین علیه السلام وهدیکه دیست کوفهءِ مردم منی واهوک اَنت گڑ ا واجه وتی ناکوزاتک مسلمءَ چه وتی نیمگءَکاسدءُ نپر کت که  برو چه منی واهوکءُ لو ٹوکان عهدءُ پیمان بزان بیعت بگر.

 حضرتءِ مسلم بن عقیل رضی الله عنه گون واجهءِ حکمءُ دستورا چه مدینه منوره دیم په کوپهءَ روانه ءُ آدیارا سربوت،واجه مسلم گون مردمان دیدار کتءُ گوشت: من چه امام حسن (ع)ءِ نیمگا په عهد ءِ گرگءَ شمئی نیمگءَ آتکگون.

حال زوت په شومین یزیدءُآییءِ مهلوکءَ سربوت که مسلم بن عقیل (رض) چه امام حسین علیه السلامءِ نیمگءَ په عهدءُ بیعتءَ مئی دیارا آتکگ.

وهدیکه یزیدءِ نپر سهی بوت اَنت که حضرتءِ امام حسین (ع) وتی کاسدا روانه کتگ  چه مردم بیعت بگیپت. آییءِ دلءَ ترسءُ بیم ئے کپت که مهلوک واجه نبی (ص) ءِ نماسگءَ لو ٹ اَنتءُ هچکس منءَ دپی جست ئے  هم نه کنت ءُ گڑامن چه حکومتءُ سلطنتءَ  پشتءَ کپان .  آ په مکرءُ اچاوگءَ گلائیش بوت .گڑا نالائکئن یزید، شومین ابنءِ زیادا دیم په کوفهءَ رهادگ کت که پیش چه واجهءِ یائگ آوانءَ پاترپءُ بیم به دَنت که نه گون امام حسین(ع)ءِ کاسدا بیعت کن اِت ءُ نه گون امام حسین(ع) .

 شومئن ابن ءِ زیادرهادگ بوتءُ گوانکی دات که هرکس گون امام حسین (ع)بیعت بکنت ءُ یزیدءِ حکما مه منّ ایت آییءِ سزا دارجنگ اِنت .هنچوش هرکس مسلم بن عقیلءَ پنه دات آمردمءَ  هماییءِ وتی لوگءِ دپادارءَ جنئن .  

دیم ترامسلم بن عقیل مختارءِ ثقفیءِ گسءَ دیوان کتگ اَتءُپه امام حسین علیه السلامءَ بیعت گرگااَت .ابنءِ زیاد سهی بوت گڑا حضرتءِ مسلم چه مختارءِ لوگا دربوتءُ هانی بن عروهءِ مرادیءِ لوگاشت. مسلم بن عقیل رضی الله عنه گوشت :اَےهانی من تئی میارءُ باهوٹان . هانی بن عروه سک ترس اِت که من چونءُ چتور مسلمءِ میارجلیءَ بکنان ؟!!!

هرپیم  آوتی مرامءُ میارداریءِ سرا ناچاربوت مسلم بن عقیلءَ پناه به دنتءُ آییءِ میارجلیءَ بکنت.مردم هم چیروکاییءُ پنهانی هانیءِ لوگا رو آکت اَنتءُ گون مسلم ءَبیعت کت اَنت.

ابنءِ زیادءِ مکرءُ پَنَدل په حضرت مسلمءِ دزگیر کنگ

ابنءِ زیاد چی پندلءُ مکرءِ سازاِت تاکه مسلم بن عقیلا دسگیر بکنت؟؟

ابنءِ زیادِءِ حیلهءُ پندل  ایش اَت که یک نپرئے که آییءِ دوستءُ براهندگ  اَت سَے هزار درهم بِدَانت که تو اشان بگر برو یک نپرئے په نام ءِ مسلم بن عوسجهءَ موک بده که مسلم بن عوسجه چه مسلم بن عقیلءِ جاهءُ مکانءَ سهیءُ مالوم داراِنت .نون تو په  پلمل ئِے آییءِ گورا برو مسلمءِ حالا مارا مالوم بکن.

ابنءِ زیادءِ شومئن سنگت گوشت تو اِے درهَمان منءَ بده ترا کار مه بیت، من وت زانان چون بکنانءُ چتور مسلم بن عقیلءَ دربگیجانءُ آییءَ نابود کنان  !!!!!

هو دوستان مناپکئن مردم شیطانءِ بیلءُ سنگت اِنت .همےمردم شُت مسیت ئے  که مسلم بن عوسجه اودان همیشه نماز وانگ اَت  .سباهءِ نمازءِ درگتا شتءُ سهبءِ نمازا وانتیءُ لهموک ئے  مسلمءِ بن عوسجهءِ گورا شتءُ گوشتی :

ڈنءَ  بیا منءَ گپ ئے گوشگی اِنت! مسلم بن عوسجهءُ آمکارئن مرد، که ابنءِ زیادءِ کاسد اَت هردو ڈنءَ شُت اَنت حیله گرین مرد گوشت :من شامءِ ملکءِ مردمان، منا گون اهل بیتءِ نبی (ص) باز حبءُدوستی اِت  باز دلمانگان امام حسین (ع) جندا بگندان .بلے منا اِی وشبهتیءُ کسمت  نصیب نبوتگ که واجهءَ بگندان. نون من سهی بوتگان که واجهءِ کاسد آتکگءُ تو هم زانے که واجه کُج اِنت.منی سرءُ جان مال متاعُ هستی واجهء سرا ندراِنت  .سَے هزاردرهم منا گون اِنت لوٹان مسلم بن عقیلءِ دستا به دیانش تانکه بتوانان وتی دَینءُ زمهءَ اداکنان                      

                                      

اگن تو منا بگوشے که واجه کُج اِنت تئی منت وارءَ بان .اگه نگوشے پرواه نه اِنت من گون تو بیعتءَ کنانءُ بلے تو مهربانی کن اِے سَے هزار درهمان مسلمءِ دستان به دَ ے.

مسلم بن عوسجه نه زانت که اِےمرد ٹگّءُ مکارین مردئے . واجه دلجم بوت که اِی راست گوشگ اِنت . گڑا گوشتی : باز وش من ترا گوشان که مسلم کجا جاگه اِنت.

بزگئن مسلم بن عوسجه گواه کت که مسلم هانی بن عروهءِ لوگا میارءُ پناه اِنت .

نون ابنءِ زیادءِ کاسد حالان دات که مسلم کجا جاها پنه گپتگ.

ابنءِ زیاد، بهانهءُ نیمون کنگ اَت که چونءُ چتور هانی بن عروهءِ لوگا په مسلمءِ دزگیرکنگا بروان !

هو آزیزان ؛هانی بن عروه که مسلم بن عقیلءِ میار جلءُ پناه دئوک اَت اناگتا نادراهءُ ناجور بوت   ابنءِ زیاد  سهی بوتءُ په وتی دلا گوشت اِی گهترئن موهءُ فرصت اِنت په همئ نیمون آئیءِ گسا بروان؛مسلمءَ دربگیجانءُ نابود کنان.

 ابن زیادیک نپرئے هانی بن عروهءِ دوارا دیمدات که انپشی من تئی گندگا کایان.

مردم که مسلم بن عقیلءِ دوستدارءُ واهوک اَنت گون مسلمءِ بن عقیلءَ گوشت اَنت که اَی مسلک اِی گهترین موهءُ درگت اِنت که ابنءی زیادءَ ماءُ شما هانی بن عروهءی لوگءُ گسءَ بکشینءُ نابود کنین....

شمئی حیالا سردارءُ شرزاتءُ وش نسلءُ نسبئن مسلم بن عقیل چی جواب دات؟؟؟

 واجه گوشت من ای کارا نکنان پرچا که من هانیءِ لوگا میاران هچ وهد وتی میار دارءِ بی عزتیءَ نکنان دوم اِشنت که امیرمومنان حضرت علی(ع) جوانین گپتارءِ  چه اللهءِ نبی (ص)نکلءَ کنت  که سرورءِ دو عالم پرمائشءَ کنت:په هچ مومنءَ جائز نه اِنت که دیگریءَ په مکرءُ اچاوگ به کشیتءُ نابود بکنت؟؟؟                          .......

آزیزئن دوستان مسلم بن عقیل رضی الله تعالی عنه په وتی چمان مرکا گندگ اَت زانتی که ابنءِ زیاد منی نابودکنگا سرین بستگءُ آییءِ شومئن نیت منی نابودی اِنت. ءُچه دگه نیمگے ابن زیاد چوشکه مُرگءِ تلگ ءُ داما گرپتاراَت راحت مسلم بن عقیل توانت که ابنءِ زیادا بکشیت بله آئیءِ ایمان آئءِ وجدان اجازت ندات که په نامردی ابن زیادا بکشیت.

مه حالے که ابنءِ زیاد ءُ آییءِ فوجءُ لشکر مسلم بن عقیلءِ رندا گشت اَنتءُ آئیءُ هزار مرادین ءُ دردانگین حضرتءِ امام حسین (ع)ءُ آییءِ 72 دلءُ جانی دوستا په بی رحمی کشتءُ شیهد کت اَنت !

رِدءُ بَند دَیوک: محمدرحیم ساسان بلوچ