گال ءُ گالرد (کلمہ ءُ جملہ ) word and sentence

چوش کہ "گالرد" چہ گال ءَ جوڑ بیت گڑا مارا پیسر ءَ گال زانگ لوٹ اِیت وھدیکہ ما گال زانت گالرد وت زانگ بیت.
انسان ءِ دپ ءَ کہ یک آوازے در کیت ھما آواز ءَ گپ گْوش اَنت، ءُ ھر گپ ءِ ٹُکرّ ءَ گال گْوش اَنت بزاں آبانی یک مُچّی یے کہ بزانتے بہ دار اِیت ما آئی ءَ گال گْوشت کن ایں ھمے گال ءَ ماں اربی ءَ "کلمہ" ءُ انگلش ءَ ورڈ word گْوش اَنت.
وھدیکہ باز گال ھور بیت ءُ یک سرجمیں گپّے جوڑ بیت آ گالرد گوشگ بیت ، گالرد ءَ اربی ءَ "جملہ" ءُ انگلش سِنٹینس sentence گْوش اَنت.

پد ءَ گال ءِ سے تَھر اَنت
نامگال، کارگال ءُ تپورگال.

*نامگال*:
ھما گال کہ کجام انسان، ھیوان، جاگہ یا چیزے ءِ...... نام بہ بیت آ نامگال گْوشگ بیت چوش کہ:
سابر، سیاھلو ، پاروک، شیتان، اشتر، اپس، لوگ، سیاھتگ، کوہ، دریا، بلوچستان ، باھوکلات. ءُ دگہ دگہ.

*کارگال*:
ھما گال کہ ماں آئی ءَ کجام کار ءِ کنگ یا بیگ ءِ بزانت یک وھد ءُ زمانگے ءَ گندگ بہ بیت چوش کہ:
کیت، آتکگ، روت، وان ایت، نبیس اِیت ، بہ وان، بہ نبیس..دگہ دگہ.

*تپورگال*:
ھما گال کہ ناں کسے ءِ نام بہ بیت ءُ ناں کار ءِ کنگ ءِ بزانت ماں آئی ءَ بہ بیت بلکیں پہ دگہ گالانی ھور کنگ ءَ پدونڈ ءُ پیشونڈی دروشم ءَ کا اَنت ، ءُ دانکہ گوں نامگال ءُ کارگال ءَ ھور مہ بنت وتی سرجمیں بزانت ءَ دات نہ کن اَنت. چوش کہ:
ماں، چہ ، داں، ءَ، ءِ، دگہ دگہ.

دلگوش:
نامگال ءَ ماں اربی ءَ "اسم" ءُ انگش ءَ "ناؤن" noun
کارگال ءَ اربی ءَ "فعل" ءُ انگش ءَ "ورب" verb
تپورگال ءَ اربی ءَ "حرف" ءُ انگلش ءَ "پرے پوزیشن" preposition گْوش اَنت

م شکاری

https://telegram.me/juhdekarwan