پریشک ( بلوچی فارسی وپشتو)

بی بی حجیجه نبی ءِ پاک صلی الله ءُ علیه وآله وسلمءِ لائکیـں لوگ بانُک.

بی بی حجیجه اللهءِ پاکیـں رسول مهتر محمدءِ مصطفی صلی اللهُ عیله وآله وصحبه وسلمءِ  اولین لوگ بانک اِنت لهتـے گوَشنت که: واجه دهم ربيع الاول، گون بی بی حجیجه (رض) آروس کتگ،بی بی حجیه (رض)  بزرگیءُ شرپ فضیلتءُ نام آوری سک زیات اَنت که اِے تاکانی تهاآوانی بیان کنگ بیَگی نه اِنت بلَے کمُوکینءِ هم بیانءَ کنان دانکه وتی دَینءَ نسبت په وتی ماتءَ بیان کنان .

حضرتءِ رسول گرامی (ص) پرمائشءَ کنت: چه مردیناں بازینءِ کمالاتءُ مزنیءَ سر بوت اَنت اُ چه جنیان تهنا چار جنین اَنت که بزرگیءُ کمالاتءَ سر بوتگ اَنت اِے چاریں جنین اِشنَت:آُسیه، مزاحمءِ جِنِکّ. ( فرعونءِ جن) مریم ،عمرانءِ جِنِکّ،حجیجه خویلدِجِنِکّ،فاطمه محمدءِ جنِکّ.

چه اسلامءِ ماحولءُ چاگردا بی بی حجیجه اولین جنین آدمی اَت که اسلامءِ دینءَ منّوک بوت ءُ اولین کسی اَت که نماز وانتءُ اللهءِ درین نبی(ص) ءَ پلامرزیءُ حمایت کت.

بی بی حجبجه مزنین مالدارءُ هستی داری اَت .

رندچه ایشی که واجه گون بی بی سانگءُ آروسءَ کنت وتی تمامین مالءُ داراییءَ واجهءِ اختیارا دَنت که هرچون واجه وت مالان حرجءَ کنت احتیارداراِنت  په همـے  هاترا اَت که  دینءِ اسلام مزنین دیم رَوئیءُ پیشرفتءِ داشتگ.

واجهءِ سِندءُ عمر ۲ ۵ سال اَت بی بی ءِ عمر ۴۰ سال که گون یکءُ دگرا سانگءُ ازدواجءِ رشتهءُ بَست اَنت.

راج دپتر نبیسوکاں گوَشنت که بی بی حجیجه مزنین داناءُ عاکلین تاجرءُ مالداری اَت آییءِ مالءُ هستی په حدی اَت که مکهءِ تها نامدارءُ مشهوراَت. بی بی وتی مالءُ هستیءِ گونا گریبءُ بی وسانءَ کمکءُ مَدَتءَ کت.بی بی ءِ لهڑ بکشیءُ داد ،دان حدی اَت که سرجمین مردم آئرا کریش(قریش)ءِ بانُکانی بانُک توارءَ کرت اَنت​.

 بی بی حجیجه ۲۴ چار سال گون واجهءَ زندگی کرت که اِے سالانی تها واجه ءِ دردءُ گمانی شریدارءُ گموارءُ دلسوزاَت. وهدیکه ناسرپدءُ بے دینیں مشرکان واجهءَ را اذیتءُ آزارءَ کت بی بی حجیجه آییءَ را دل تسلیءُ آرامشءَ دات ءُ گون آییءِ سکیءُ مشکلان همراهءُ همکوپگ اَت.

بی بی شش زهگ داشتگ که چار دتگءُ دو پسگ اَنت، مردین زهگانی نام  قاسمءُ عبدالله که هما گونڈیءَ چه جهانءَ رُکست کرتگ اَنت ءُ چاریں دتگانی نام،بی بی زینب بی بی ام کلثوم بی بی رقیه ءُ بی بی فاطمه خاتونءِ جنّت.

روایتانی توکا کئیت که بی بی دهم بعثت دهمءِ ماهءِ مبارک ءِرمضانءَ چه اِے کوڑهیں دهرا رُکستءُ دان ابد بهشتءِ هنکینءَ جهگیرءُ ماندگار بوت.

سالے که بی بی حجیجه وفات کتگ آسالءَ عربی زبانءَ عام الحُزن بزان گمءُارمانءِ سالءَ گُوَشنت.

بی بی مومنانی مات اِنت که الله جل جلاله وتی پاکیں کلامءَ حضرتءِ رسول (ص) لوگ بانُکانءَ امهات المومنینءَ گوشیت.

جی دوستان بی بی حجیجه(رض) وفاتءُ بیرانی هم په نبی پاک (ص)مزنین گمءُ ارمانی اَت که همیشهءُ دائم واجهءِ کمک کنوکءُمَـدَ ت کنوک اَت ءُ هم په بی بی فاطمهءِ زهرا (س) ءُ هم په عالمءِ اسلامءَ مزنین گمءُ مصیبتی اَت.

 ما اے مزن نامءُ مزن شانین بی بیءِ رحلتءُ وفاتءَ تسلیتءَ گوشینءُ وتی دلپدردیءَ جارءَ جنین .

ربءِ پاک مئے آسرءُ عاکبتءَ هیرءُ مارا ایمانءِ واهند بکنت آمـــــین.